ـ1ـ
اليوم التقوا الأرزات
بالكرمات
لما التقوا الأحباب من مدّه
وجنّت عذارى القمر
والنجمات
لمّا التقوا وبعيونهن ورده
ـ2ـ
الورده زغيره لو عطرها فاح
بالحب
بالإخلاص
بتندّي
وفي طير بالغربه ما عاد لو جناح
إمتى لعنا بفرح بيهدّي
ـ3ـ
شربل شو غنّى للوطن أشعار
وقلّن:
يا ويلو اللي بيتعدّي
ولبنان
لمّا شعّلوه بنار
صار الشعر للنار يتحدّي
ـ4ـ
نحنا ع حبّك رح منبقى دوم
إخوة حرف
بمزالق الشدّه
وصرخه قويّه محمّله باللوم
رح نصرخا
بوجوه مرتدّه
ـ5ـ
الليله يا شربل
هالقمر شو قال:
يا رب تبقى هيك المودّه
اليوم الغزاله معمشقه ع جبال
وعروس هالعاصي معا بالبال
وطيور تنسج من الزنبق شال
وورقات دالي
تفرشا مخدّه
ـ6ـ
سألت طيور الكرم
والعنبات
غير مجدليّا الأرز ما بدّي
وبمجدليّا
سألت الأرزات
عن قلبها المشلوح بِمْحَرْدِه
ـ7ـ
مجدليّا..
مطرح ما شمس معانقَه فيّا
مطرح ما في عْصافير عَ الميَّه
مطرح ما في همسات وغناني
مطرح ما في نسمات سكرانه
وشلال حب ونبع حنيَّه
هونيك والعشاق
والأشعار
عم تسكر بمليون جنيَّه
وهونيك شلحت شالها الأزهار
ولبست قميص الفجر حوريّه
مطرح ما في عَ غصون أرز حْمام
ولوحات..
ألله حلا محليَّا
هونيك غزلت هالشمس أحلام
وغطّ الفجر بعيون خضرا ونام
وخلق الشعر والوحي والإلهام
ولوّن قمر بالمجد..
مجدليّا
محردة، حماه، سوريا 1988
**
